‘பில்லியனர்ஸ் பன்கர்’: மிரட்டும் திகில், மெருகேற்றும் ‘மணி ஹெய்ஸ்ட்’ தொனி!

நெட்பிளிக்ஸ் தளத்தில் வெளியாகி, உலகையே உலுக்கிய ‘மணி ஹெய்ஸ்ட்’ (Money Heist) என்ற ஸ்பானிஷ் தொடரை உருவாக்கிய இயக்குநர் அலெக்ஸ் பினா (Álex Pina), மீண்டும் ஒருமுறை தனது திரைக்கதை மந்திரத்தால் ரசிகர்களை ஆச்சரியப்படுத்தியுள்ளார். அவருடைய புதிய படைப்பான ‘பில்லியனர்ஸ் பன்கர்’ (Billionaires’ Bunker), எதிர்பார்ப்புகளைத் தாண்டி ஒரு த்ரில்லர் அனுபவத்தை வழங்குகிறது.

கதைக்கருவின் சுவாரஸ்யம்

ஒரு மூன்றாவது உலகப் போர் வரும் என்ற அச்சம் நிறைந்த சூழலில், உலகின் முன்னணி பணக்காரர்கள் ஒரு ரகசிய பதுங்குக்குழிக்குள் அடைக்கப்படுகிறார்கள். 1,000 அடி ஆழத்தில், தண்ணீருக்கு அடியில், அனைத்து நவீன வசதிகளுடன் உருவாக்கப்பட்ட இந்த ‘பங்கர்’, அவர்களைப் பாதுகாக்க உருவாக்கப்பட்ட சொர்க்கம். ஆனால், இரண்டு பணக்கார குடும்பங்களுக்கு இடையே இருக்கும் பழைய பகை, அந்த அமைதியான சூழலைக் குலைக்கத் தொடங்குகிறது. இதுதான் கதையின் ஒற்றை வரி. ஆனால், முதல் அத்தியாயத்திலேயே ஒரு எதிர்பாராத திருப்பத்தை இயக்குநர் வைத்து, கதையை வேறு ஒரு தளத்திற்கு நகர்த்திவிடுகிறார்.

படைப்பாளியின் முத்திரை

அலெக்ஸ் பினாவின் திரைக்கதை பாணி ‘பில்லியனர்ஸ் பன்கர்’ தொடரிலும் தெளிவாகத் தெரிகிறது. ‘மணி ஹெய்ஸ்ட்’ தொடரில் நாம் பார்த்த அதே பரபரப்பான திட்டமிடல், எதிர் திட்டங்கள், உளவியல் ரீதியான மோதல்கள், மற்றும் கதாபாத்திரங்களுக்கிடையே ஏற்படும் உணர்ச்சிகரமான பிணைப்புகள் என அனைத்தும் இந்தத் தொடரிலும் சிறப்பாகப் பின்னப்பட்டுள்ளன.

தொடக்கத்திலேயே கதைக்களம், கதாபாத்திரங்களின் பின்னணி என அனைத்தையும் பத்தே நிமிடங்களில் விரைவாக அறிமுகப்படுத்தி, உடனடியாகக் கதையின் மையப்புள்ளிக்கு அழைத்துச் சென்ற விதம், ஒரு நேர்த்தியான இயக்குநரின் கைவண்ணத்தைக் காட்டுகிறது.

விமர்சனப் பார்வை

தொடரில் வரும் பணக்காரர்கள், தங்கள் பணத்தின் மூலம் எதையும் வாங்கலாம் என்று நம்புகிறார்கள். ஆனால், பதுங்குக்குழிக்குள் அவர்கள் எதிர்கொள்ளும் சவால்கள், பணம் அதிகாரத்தின் இறுதி வடிவம் இல்லை என்பதை உணர்த்துகிறது. பணக்காரர்களின் அகம்பாவம், பேராசை, மற்றும் அதை வெளிப்படுத்தும் விதம் ஆகியவை சுவாரஸ்யமாகப் படமாக்கப்பட்டுள்ளன.

ஒரு சீசனை இரண்டு நாட்களில் பார்த்து முடிக்கும் அளவுக்கு, இந்தத் தொடர் நம்மை ஈர்த்து விடுகிறது. ஒவ்வொரு அத்தியாயமும் ஒரு புதிய திருப்பத்துடன் முடிவடைவதால், அடுத்த அத்தியாயத்தைப் பார்க்கத் தூண்டுகிறது. கதையின் இறுதியில் வரும் ‘க்ளிஃப்ஹேங்கர்’, அடுத்த சீசனுக்கான ஆவலை மேலும் தூண்டுகிறது. ஆனால், ‘மணி ஹெய்ஸ்ட்’ போலவே, அடுத்த சீசனுக்காக நாம் நீண்ட காலம் காத்திருக்க வேண்டியிருக்கும் என்பதுதான் ஒரே குறை.

மொத்தத்தில் பரபரப்பான சஸ்பென்ஸ் நிறைந்த ஒரு தொடரைத் தேடுபவர்களுக்கு, ‘பில்லியனர்ஸ் பன்கர்’ ஒரு சிறந்த தேர்வாகும். இது வெறும் பணக்காரர்களின் கதை மட்டுமல்ல, மனிதர்களின் உணர்ச்சிகள், பிழைத்திருக்கப் போராடும் மனநிலை, மற்றும் எதிர்பாராத சூழல்களில் வெளிப்படும் குணங்கள் பற்றிய ஒரு ஆழமான பார்வை.

நீங்கள் அலெக்ஸ் பினாவின் ரசிகர் என்றால், ‘பில்லியனர்ஸ் பன்கர்’ உங்களைக் கவர நிச்சயம் தவறாது!

கதிரவன்